للمحجبات...نصائح ولفات طرح سهله وبسيطة

ملف كامل عن: لفات الحجاب - احدث لفات الطرح - نصائح ولفات تجنن






أغلب البنات النهارده محجبات وأصبح اهتمامهم بالحجاب يوازي أو يفوق اهتمامهم بشعرهم، وأصبح البديل للكوافير والبحث عن قصة جديدة أو لون مختلف هو لف الطرحة بألوان زاهية على آخر موضة.. أشكال ربطات على هيئة تسريحة شعر "ضفيرة وكحكة"، وأما الأقمشة (دي فيها كلام كتير) "تل" و"شيفون" "وترتر"، الصبح والضهر وفي كل وقت...

المعادلة الصعبة في كل الحاجات دي ازاي أكون محجبة أحترم "حجابي" وفي نفس الوقت شكلي حلو ستايل على الموضة ومش "مبهرج" ولافت للنظر لدرجة تثير انتقاد الآخرين..

نصائح ذهبية لكل بنت محجبة ازاي تتعامل صح مع الحجاب.. ألوان الموضة في الإيشاربات ؟

لون الطرحة حسب لون اللبس

هل البني المحروق ممكن "يغمق" البشرة وخاصة إن لوننا خمري أحياناً مائل للاسمرار؟

لا أبداً البني جميل جداً مع كل ألوان البشرة،

حكاية إن الروز والموف لا تصلح للبشرة السمراء أو الخمرية أو إنه "بيسمر جداً

ده كلام مش صحيح، النهارده مافيش لون صريح.. الروز له درجات مختلفة وموجودة في كل أنواع المكياج كمان الموف, والأخضر.. المهم اختيار الدرجة من اللون القريبة من درجة لون البشرة وأكيد هتكون مناسبة ولا تعطي نتيجة عكسية

- ازاي تختاري خامة أو قماش الإيشارب صح؟

نوع القماش أو خامة الإيشارب تعتمد على نوع اللبس، كمان فيه أنواع من الأقمشة من المفضل نتجنبها حتى لو عجبك لونها أو تطريزها أو نقشتها.. من الأقمشة المزعجة في لبس الحجاب "الأوراجنزا الهايشة".. ابعدي عن الأقمشة "الناشفة" لأنها صعبة في الربط، خلي عنيكِِ على نوعية الأقمشة الناعمة والأقطان، الحرير على قطن، الشيفونات بأنواعها كلها خامات حلوة جداً ومناسبة وعملية والتل كمان... بأكد إن الإيشارب مهم إنه يكون عملي في اللف، ممكن الإيشارب يكون غالي ووحش في ربطته وبعد شوية هتكرهي الإيشارب وهتركنيه على جنب بعد ما غرمتي ثمنه

نوعية القماش المناسبة والعملية للبنت في الجامعة عشان يكون حجابها مريح وفي نفس الوقت شكلها مش مبهدل

تختار الأقطان والشيفونات المطفية "بدون لمعة".. الأقمشة دي بتستحمل جداً الحركة طول النهار، فالأقطان فيها ألوان كثيرة وأشكالها حلوة جداً، والقطن على حرير فيه تطريز خفيف حلو كمان وموضة جداً يكون في طرف الإيشارب تطريز أو ترتر بس المهم يكون "Simple" جداً.. عشان الجامعة ممكن تختار الإيشاربات الأقطان المخططة أو المنقوشة، فيه مساحة تنوع النهارده وألوان ينفع تدخل مع بعض تعطي شكل جديد في كل مرة.

والتطريز البسيط يعطى جمال ورقة

أفكار لحجاب ممكن يناسب لفترة بعد الظهر أو بالليل؟

ممكن تحتفظي بشكل ربطتك اللي بترتاحي معاها والمناسبة لشكل واستدارة الوجه وتستخدمي إكسسوار مختلف.. حلق كبير، سلسلة فيها دلاية فيها حجر فيروزي، خاتم فضي بفص ملون.. النهارده مافيش لبس محدد للنهار وآخر لليل، مساحة الحركة تكون إضافة حاجة جديدة للبسك حسب وقت الخروج وطبعاً المناسب للمكان.

ازاي البنت المحجبة تختار الربطة المناسبة لشكلها؟

لازم تعرف هي بتحب إيه، الربطة التقليدية أو الربطة "الاسبانش" المربوطة "على ورا" عشان تكون مرتاحة ومقتنعة بربطة الإيشارب، ولو هي محجبة جديد ماتستعجلش على نفسها "شوية..... شوية" مش معقول

هتقدر تلف الإيشارب زي واحدة متحجبة من زمان.. البنات بتكتئب وبتزعل قوي عشان شكل حجابها مش "مظبوط" عشان كده لازم المحجبة جديد تلبس في الأول حجاب ربطته سهلة ولا تستخدم أنواع ناعمة جداً ممكن تتزحلق بسرعة وتظهر شعرها، ممكن تستخدم الأقطان في البداية لأنها بتثبت، وعشان تلم شعرهاكويس جداً تلبس "بونيه" قطن ولا تظهره، ومهمته مساعدتها في تثبيت الإيشارب ويمسك الشعر كله وتختار ربطة سهلة .

الربطة "الإسبانيش" موضة جداً، ازاي نربطها "صح" خطوة خطوة....؟

أولاً نلبس بونيه قطن يلم الشعر كويس وبعد كده نجيب طرحة مستطيلة لون تاني، فلو إن البونيه بني محروق تكون الطرحة تركواز تبين جزء من البونيه ونحط الطرحة الثانية بمحاذاة خط البونيه ونربطها على ورا كويس جداً وممكن نجيب طرحة تانية شيفون مثلاً وتكون لونها بني محروق ونربطها فوق التركواز، بعد كده نبين جزء منها زي ما عملنا في الخطوة السابقة ونربط كويس جداً، بعد كده نبدأ في ربط أطراف الطرحتين البني والتركواز بحيث ممكن نربط طرف الأولى مع الثانية والعكس، وإنتِ قدام المرايا هتلاقي نفسك بتربطي الأطراف، وممكن تبتكري تعملي الأطراف "كحكة" أو تعملي بطرف "كحكة" وتسيبي الطرفين نازلين على كتفك على حسب ذوق وشكل وجهك.

نصيحة للف الطرح التقليدية؟

لازم تلبسي بونيه قطن وتحطي الإيشارب على حرف البونيه عشان يختفي وتمسكي الطرف القصير بدبوس مشبك بالطرف الكبير وتلفي الطرف الطويل حول الرأس وتثبتي بالدبابيس، وبلاش أكتر من إيشارب في الأول.. كفاية لفة بسيطة.

ولو عاوزة تدخل ألوان في اللفة التقليدية؟

زي ما قلنا البونيه وبعد كده الإيشارب على حرف البونيه وبعدها تمسك الطرف القصير بالطرف الطويل عند الرقبة، وبعد كده الإيشارب الثاني بعده بمسافة من الأول وتمسك أطرافه وتلف طرف الأولى وطرف الثانية في اتجاه واحد بشرط طرف يظهر لونه قبل الثاني، أو تحط الطرفين فوق بعض وتلفهم مرة واحدة وتحط دبابيس للتثبيت

ممكن تلبس "بندانا" وتلف الطرحة، ونصيحتي بلاش وضع شريط بلاستيك في مقدمة الطرحة.. ممكن تستخدمي "اسبراي نشا مخصوص للمكوى"، عشان تنشي الطرحة. إيه رأيك في إضافة الضفيرة من قماش وعمل "الكحكة" بالربطة "الإسبانيش"؟

 لا أفضل الإضافات الكثيرة للحجاب طالما اخترتِ الحجاب عن قناعة لازم تكوني محتشمة وبسيطة في نفس الوقت... لازم تتعاملي مع الحجاب وكأنه شعرك وتحبيه عشان شكلك يكون حلو فيه ولما توصلي للدرجة دي أكيد هتبتكري في الربطات أكثر

نصيحتى للعروسة المحجبة؟

تبحث عن لون مناسب لبشرتها يبرز جمال لونها تفكر في موديل مناسب لجسمها وتفكر ازاي يكون شكلها مختلف وجديد، ومش شرط إن موديل أو ربطة عجبتك إنها ممكن تنفع معاك أو تليق عليك، وكمان تختار حد يساعدها في ربط الطرحة لأنه متخصص وبيتحكم أكثر في الربط وله خبرة في ابتكار ربطات جديدة.

لفات طرح 2010/2011











لفات طرح تركية

لفات حجاب للتحركات اليوميه وللجامعه نموذج1 تشبكها من عند الرقبة من الوسط ويكون طرف أطول من طرف عشان نقدر نلفها حول الرأس وممكن نزود عليها لو رايحين سهرة أو مناسبة إيشارب كمان بيلمع أو تل أو قماشة سواريه نلفها فوق الإيشارب الأول.. ممكن تكون اللفة طويلة.. الربطة دي بتليق مع كل وجه ومهمة جدا وبتغطي الرقبة لو لابسة حاجة مفتوحة أو قيمص. نموذج 2 نستخدم فيها إيشاربين مع بعض.. الأول مستطيل عرضه 2 سم وطوله متر ونص من أول طرف الإيشارب وعلى أول منابت الشعر نربطه على ورا على كحكة الشعر، وبعد كده بنجيب إيشارب تاني كبير عريض وطويل ونحطه فوق الإيشارب الأول بعده بمسافة أو فوقه.. الطرف الطويل ممكن نعمل به شكل الوردة أو شكل آخر. 3 دي مجموعة من الربطات الإسبانش للبنات اللي بتحب إنها تلبس إسبانش بس في نفس الوقت بتحب الطرحة تكون مغطية منطقة الرقبة.. وعلى فكرة مجموعة الربطات دي بسيطة جدا وسهلة في التنفيذ بس أنتِ امشي واحدة واحدة زي ما إحنا هنقولك ولو أول مرة ما طلعتش الربطة مضبوطة معاكي جربي تاني وإن شاء الله هتطلع معاكي مضبوطة وزي الفل.. الربطة الأولى 1- هتجيبي بندانة قطن وتلبسيها بعد كده هتجيبي إيشارب طويل وتحطيه في منتصف رأسك... 2- هتجيبي دبابيس علشان تثبتي الإيشارب في منتصف رأسك... هتجيبي أحد أطراف الإيشارب وتلفيه حوالين رقبتك وتثبتي طرف الإيشارب بدبوس على أحد الأجناب. الربطة التانية 1- هتجيبي إيشارب طويل وتربطيه كويس من الخلف وياريت الربطة دي تكون حوالين كحكة شعرك... هتجيبي الإيشارب التاني وتحطيه من قدام بطريقة مائلة بحيث إن جزء من الإيشارب الأولاني يبان وتربطيه من الخلف.. 2- هتلفي أحد أطراف الإيشارب الأول حوالين كحكة شعرك مرة واحدة وتثبتي الطرف ده بالدبابيس كويس وتسيبي الطرف التاني علشان تعملي بيه ضفيرة... هتجيبي أحد أطراف الإيشارب الثاني وتلفيه حوالين رقبتك وتثبتيه بدبوس من على الجنب. 3- هتمسكي الطرف الثاني من كل إيشارب وتضفريهم مع بعض.. وتسيبي الضفيرة دي على ظهرك أو على كتفك.. على فكرة ممكن تبتكري حاجات تانية في اللفة دي زي مثلا إنك تحطي الإيشارب التاني بشكل ثابت على رأسك مش مائل بحيث إن جزء بسيط من الإيشارب الأولاني يبان. الربطة الثالثة - هتربطي شعرك بالإيشارب من الخلف.. هتجيبي إيشارب تاني يكون لونه مناسب للون الإيشارب الأولاني وتحطيه في منتصف رأسك وتربطيه هو كمان من الخلف. 2- هتبدئي في إنك تلفي الإيشارب التاني حوالين كحكة شعرك وتثبتي اللفة دي بالدبابيس. 3- هتجيبي أطراف الإيشارب الأولاني وتربطيه حوالين رقبتك من الأمام.. على فكرة بالشكل ده ممكن تستغني عن الكوفيه الصوف اللي ممكن تلبسيها في الشتاء.  ويؤكد خبراء الموضة أن ربطة الحجاب تختلف في الصباح عن المساء ، موضحين أنه في الصباح يجب أن تكون بسيطة وخفيفة ، حيث يمكنكِ أن تستخدمين طرحة أو طرحتين على الأكثر ، وحاولي أن تبعدي عن الألوان الكثيرة ، أي إذا كنتِ ترتدين ملابس سادة فيجب أن تكون الطرحة بها ألوان مختلفة ، أما إذا كنت ترتدين ملابس ملونة أو فيها نقوش يجب أن تكون الطرحة سادة ، وإليكِ هذه اللفات الجميلة : الربطة الأولي 1- ضعي البندانة على راسك بطريقة عكسية كما مبين في الصورة 2 - ضعي بندانة أخري عكس الأولي 3 - ضعي الإيشارب الملون على نهاية البندانة الثانية 4 - لفي الجهة الطويلة من الإيشارب على الرقبة ثم إلى أعلي الرأس وثبتيه ، واتركي الجهة القصيرة على الكتف كما في الصورة الربطة الثانية 1 - يتم لم الشعر إلى أسفل على شكل كعكة ، ثم يتم ربط الإيشارب الشيفون من الخلف أسفل كعكة الشعر 2 - ضعي الإيشارب الشيفون الحرير على بعد مسافة من الرأس واربطيه من الخلف 3- امسكي أحد أطراف الإيشارب الشيفون الحرير 4- لفيه حول كعكة الشعر كما في الصورة 5- ضعي الإيشارب الأخر حول الرقبة واربطيه ربطة خفيفة على الجانب الأيمن من الرقبة الربطة الثالثة 1- لمي شعرك إلي أسفل على شكل كعكة ، وضعي البندانة الصغيرة 2 – ضعي الإيشارب على البندانة واربطيه من الخلف أسفل كعكة الشعر ، ثم يتم برم الطرفين مع بعض 3- يتم لف الطرفان بعد برمهما حول كعكة الشعر كما مبين في الصور 4- يتم تثبيت الطرف المتبقي على أحد الأجناب واحضاره إلى الأمام على أن يتعالي على الكتف الربطة الرابعة  1- اربطي إيشارب صغير على رأسك 2- ضعي إيشارب أخر في وسط الجبهة واربطيه أعلي الرأس كما مبين في الصورة 3- تأكدي أن الربطة على أي جانب 4- جمعي الإيشاربات كلها على الكعكة وثبتيهم جيداً ولأن ربطات الطرح تختلف على حسب شكل الوجه ورسمته ، يقدم لكِ الخبراء بعض الربطات التي تناسب رسمة كل وجه : الوجه المستديّر تجنبي ربط الطرحة على جنب إطلاقا لأنها تزيد من مساحة (الخدود) لذا يجب أن تكون الطرحة للخلف ، أو لأسفل الرأس أو لأعلاها . الوجه المربع أو المستطيل الوجه المربع والمستطيل يجب أن تربط الطرحة في وسط الجبهة على شكل (كروس) أي طرحة عكس الثانية وذلك لإخفاء الجبهة والتقليل منها . الوجه البيضاوي معظم الربطات تتماشي معه ولا يوجد مشكلة معه . نصائح للمحجبات -كما قلت لكى ابحثي عن نوعية الأقمشة الناعمة والأقطان، الحرير، أو الحرير على قطن، الشيفونات بأنواعها كلها خامات مناسبة وعملية . - الأقطان والشيفونات المطفية "بدون لمعة" هي من نوعية القماش المناسبة والعملية للفتاة في الجامعة . - اختاري الإيشارب المطرز بتطريزات بسيطة لأنه يعطى جمال ورقة . - نوعي في ربطات الحجاب ولا تثبتي على ربطة واحدة لتكوني دائماً متجددة ومتطورة. - استخدمي الاكسسوارات اللازمة للحجاب التي تظهر جمال الطرحة وتبرزها . - ضعي الماكياج المناسب مع ألوان الطرحة والملابس التي ترتديها . اتمنى الموضوع يعجبكم